«New generation project» ընկերութեան նախաձեռնութեամբ, պալէի աստղեր Րաֆֆի Գալստեան եւ Նարէ Մարկոսեան ելոյթ ունեցած են Մոլտաւիոյ մէջ տեղի ունեցած «Մարիա Պիեսու» օփերայի եւ պալէի 32-րդ միջազգային փառատօնին։

Սեպտեմբեր 8-ին Քիշնեւի մէջ ծայր առած փառատօնին մասնակցած են պալէի նշանաւոր պարողներ 14 երկիրներէ՝ Ռումանիայէն, Պուլկարիայէն, Իտալիայէն, Ուքրաինայէն, Աւստրիայէն, Սպանիայէն, Վենեզուելայէն, Հայաստանէն…։

Սեպտեմբեր 26-ին, հանդիսատեսին հրամցուող գեղեցիկ անակնկալներէն մէկը Արամ Խաչատրեանի «Սպարտակ» պալէի ներկայացումը եղած է. Սպարտակի եւ Ֆրիժիայի դերերով հանդէս եկած են հայ արուեստագէտները։ Նարէի եւ Րաֆֆիի փայլուն ելոյթը արժանացած է բարձր գնահատանքի։

Նշենք, թէ 1990-ին սկսած «Մարիա Պիեսու» միջազգային փառատօնը մշակութային նշանակալի իրադարձութիւններէն մէկն է։