Ստեփանակերտի մէջ, Արցախի Հանրապետութեան Կառավարութեան շէնքին դուռը, որ ներկայիս ∩օժտուած է∪ ազերպայճանական նախագահական ընտրութիւններու ազդերով
Ազերպայճանի Կեդրոնական ընտրական յանձնաժողովի (ԿԸՅ) նախագահ Մազահիր Փանահով Փետրուար 6-ին՝ երկրի նախագահական ընտրութիւններու վաղորդայնին տուած ասուլիսին դիմած է ԵԱՀԿ-ի Ժողովրդավարական հաստատութիւններու մարդկային իրաւանց գրասենեակի (ԺՀՄԻԳ) դէտերուն, որ անոնք ընտրութիւններու դիտարկում կատարեն նաեւ Ազերպայճանի «ազատագրուած տարածքներ»-ուն մէջ։
Ան ըսած է, որ ԵԱՀԿ-ի ԺՀՄԻԳ-ի ներկայացուցիչները այցելած են այդ տարածքները ու հանդիպումներ ունեցած շրջանային ընտրական յանձնաժողովներու նախագահներուն հետ։
“Մեր յատուկ խնդրանքն է, որ քուէարկութեան օրը միջազգային կազմակերպությունները գտնուին ազատագրուած տարածքներուն մէջ։ Այդ յարգանք մը պիտի ըլլայ հանդէպ ազերպայճանցի ժողովուրդին։ Որոշ կառոյցներ արդէն յայտարարեցին, որ քուէարկութեան օրը պիտի երթան ազատագրուած տարածքներ”,– ըսած է Փանահով։
Ազերպայճանի Կեդրոնական ընտրական յանձնաժողովի նախագահի այս ու նման յայտարարութիւններուն ետին թաքնուած՝ Ազերպայճանցիներու բուն մտահոգութիւնը յայտնապէս իրադրութիւնը օրինականացնելն է։
Միւս կողմէ, ազերպայճանական լրասփիւռները յատուկ լրատւութեամբ կ՚անդրադառնան Ստեփանակերտի (Խանքենտիի) պարագային, անկասկած քիչ մը աւելի ցաւ պատճառելու համար Հայոց սրտերուն։ Այս լուրերուն կ՚ընկերանայ լուսանկարներու ճոխ շարք մը, ուր կ՚երեւի Ստեփանակերտի որբացած Կառավարութեան շէնքը, որ այս առթիւ ընտրական տեղամասի վերածուած է։ ■
© 2023 Բոլոր իրաւունքները վերապահուած են։
