“Մենք չենք պատրաստւում մեր տները թողնել, ինչ է՝ Նիկոլ Փաշինեանը սխալ բանակցութիւններ է վարում”

Յունիս 27-ին, Աղաւնոյի համայնքապետ Անդրանիկ Չաւուշեան «News.am»-ի հետ զրոյցին՝ արձագանգելով վարչապետի նոյն օրը կատարած յայտարարութիւններուն, ըսած է.– “Մենք չենք պատրաստւում մեր տները թողնել, ինչ է՝ Նիկոլ Փաշինեանը սխալ բանակցութիւններ է վարում”։

Նշենք, թէ Փաշինեան Յունիս 27-ի առցանց ասուլիսին նշած էր.- “Երթուղու փոփոխութեան դէպքում այն տարածքները, որոնք չեն գտնւում նախկին ԼՂԻՄ տարածքում, անցնելու են Ադրբեջանի վերահսկողութեան տակ։ Լաչինի բնակիչների հարցերը կառավարութիւնը լուծում է, բնակիչները բնականաբար պէտք է ապահովուեն բնակարաններով։ Ըստ էութեան՝ Լաչինում այսօր ընտանիքներ չեն բնակւում, իսկ Աղաւնոյ գիւղի բնակիչների խնդիրները Արցախի կառավարութեան միջոցներով կը լուծուեն։ Սուս գիւղի  մասին այս պահին յստակ ոչինչ չեմ կարող ասել։ Խնդիրն այն է, թէ այդ տարածքները ԼՂԻՄ սահմաններից նե՞րս, թէ՞ դուրս են գտնւում։ Յամենայն դէպս, երբ այս հարցը քննարկել ենք Արցախի իշխանութիւնների հետ, Սուս գիւղի անունը չի քննարկուել”։

Ըստ Աղաւնոյի համայնքապետին՝ Նիկոլ Փաշինեան չի կրնար անընդհատ զիջողի դիրքի մէջ ըլլալ։

“Ես չեմ հասկանում, թէ յանուն ի՛նչի է նա այդպէս անում։ Ոեւէ մէկն իրեն մանդատ չի տուել, որ ինքը յանձնի հողեր։ Նա ասում է՝ Աղաւնոյի բնակիչները Արցախին, այսինքն՝ դու պիտի նստես բանակցութեան, ի զուր որոշումներ կայացնես, քո վրայից ցրես ու Արցախի իշխանութիւնների վրա՞յ գցես։ Սխալ կ՚անեն թէ՛ ինքը եւ թէ իր եղբայր Ալիեւը։ Ես չեմ լքելու, եւ աւելի՛ն, աւելի լուրջ քայլերի ենք պատրաստուելու”,– ըսած է Չաւուշեան։

Հարցումին՝ արդեօք անակնկա՞լ էր Նիկոլ Փաշինեանի յայտարարութիւնը, համայնքապետը յայտնած է․– “Չէ՛, անակնկալ չէր։ Ես սպասում էի, որ նա այդպիսի յայտարարութիւն կ՚անի։ Որ մարդկանց ասում էինք, ատելութեամբ էին արձագանգում։ Հազարաւոր մարդիկ զոհուեցին, որ հողը մնայ, հիմա հող ենք զիջում, որ մարդու կեա՞նք փրկենք, մեզ այս կեանքը պէտք չի”։