Արցախի հանրային հեռատեսիլին տուած հարցազրոյցին, նախագահ Արայիկ Յարութիւնեան յայտարարած է, թէ  Արցախի ժողովուրդին ինքնորոշման իրաւունքը քննարկման ենթակայ չէ։ “Որեւէ շփման ու հանդիպման ընթացքում մենք դա շեշտում ենք։ Արցախը Ադրբեջանի կազմում լինելու մասին չենք էլ մտածում, Արցախը դէ ֆակտօ կայ, ղեկավարւում է Սահմանադրութեամբ։ Այլ կարգավիճակում Արցախը պատկերացնել անհնարին է։ Դէ ֆակտօ անկախութիւնը չի քննարկւում։ Ի հարկէ դէ եուրէ  ճանաչման առումով շատ ժամանակ ունենք անցընելու, պայքարելու, տարիներ, տասնամեակներ։ Պայքարը պիտի շարունակել միջազգային հարթակներում, տարբեր երկրների, բարեկամ երկրների, ժողովրդավարութիւնը յարգող երկրների հետ։

Այդ առումով վիճակը բարդացել է, քանի որ միջազգային դերակատարները, որոնք փորձում են Հայաստան-Ադրբեջան խաղաղութեան պայմանագրի հետ կապուած իրենց ծառայութիւնները մատուցել, ստորադասում են արցախեան խնդիրը։ Այդքան էլ նպաստաւոր առաջարկներ չեն ներկայացնում։ Դա չի խանգարում մեզ իրացնելու ՄԱԿ-ի կանոնադրութեան ազգերի ինքնորոշման չափանիշը եւ մեր պայքարը լինելու է այդ շրջանակներում։ Դա զիջելու որեւէ ցանկութիւն չունենք։ Արցախի ժողովրդի ինքնորոշման իրաւունքը որեւէ կապ չունի տարածքային ամբողջականութեան չափանիշի հետ: Մէկ բան յստակ է. Արցախը հայկական պահելու լաւագոյն բանաձեւը Արցախում ապրելով պայքարելն է: Ես ու իմ ընտանիքն ընտրել ենք այդ ուղին»,– ընդգծած է Արցախի Հանրապետութեան նախագահը։

Ան յայտնած է, որ Հայաստանի եւ Ազերպայճանի միջեւ խաղաղութեան պայմանագիրը չի կրնար խոչընդոտ հանդիսանալ Արցախահայութեան ինքնորոշման համար մղուող պայքարին։

Ինչ կը վերաբերի Պաքուի հետ ուղղակի բանակցութիւններուն, Յարութիւնեան ըսած է, թէ պէտք է գնահատենք, որ այդ բանակցութիւնները ի՛նչ պիտի տան մեզի։

“Եթէ կարողանալու ենք պահպանել մեր դէ ֆակտօ անկախութիւնը, կայունութիւնը, խաղաղութիւնը, եթէ կարողանալու ենք այդ հանդիպումների ժամանակ մեզ համար կենսական հարցեր բարձրացնել եւ լուծել, ի հարկէ պարտաւոր ենք հանդիպել, չզիջելով մեր ինքնորոշման իրաւունքը եւ կասկածի տակ չդնելով մեր անկախութեան ճանապարհը”,– շեշտած է նախագահը։