Պաշտօնական այցով Պուէնոս Այրէս գտնուող Հայաստանի Արտաքին գործոց (ԱԳ) նախարար Արարատ Միրզոյեան Մարտ 25-ին հանդիպում ունեցած է Արժանթինի Արտաքին յարաբերութիւններու, միջազգային առեւտուրի եւ պաշտամունքի նախարար Տիանա Մոնտինոյի հետ:
Երկուստեք գոհունակութեամբ ընդգծած են երկու երկիրներու միջեւ առկայ քաղաքական երկխօսութեան բարձր մակարդակը՝ հիմնուած Հայաստանի եւ Արժանթինի ժողովուրդներուն միջեւ երկարամեայ բարեկամական կապերու վրայ։ Կողմերը պատրաստակամութիւն յայտնած են զարգացնելու համագործակցութիւնը յատկապէս առեւտրատնտեսական, բարձր արհեստագիտութիւններու, կրթութեան, ուժանիւթի բնագաւառներուն մէջ։
Նախարարները քննարկած են նաեւ տարածաշրջանային անվտանգութեան վերաբերող հարցեր։ Արարատ Միրզոյեան իր պաշտօնակցին ներկայացուցած է Հայաստանի եւ Ազերպայճանի միջեւ յարաբերութիւններու կարգաւորման հոլովոյթին վերջին զարգացումները եւ խաղաղութեան պայմանագրի նախագիծին շուրջ ընթացող բանակցութիւնները։
Հայաստանի ԱԳ նախարարին Պուէնոս Այրէս այցելութեան առիթով խորհրդարանին մէջ կազմակերպուած է ընդունելութիւն մը, որուն մասնակցած են երեսփոխաններ, Արտաքին գործոց եւ քաղաքային իշխանութիւններու պաշտօնատարներ, օտար երկիրներու դեսպաններ, հայ եւ այլ համայնքներու ներկայացուցիչներ։
Խորհրդարանի փոխնախագահները իրենց ելոյթներու ընթացքին ընդգծած են Հայաստանի եւ Արժանթինի միջեւ ամուր եւ սերտ յարաբերութիւնները:
Ընդունելութեան ժամանակ Արարատ Միրզոյեանին շնորհուած է «Պուէնոս Այրէսի պատուոյ հիւր»-ի տոտղոսը։
Տեղի ունեցած է նաեւ «Հայկական Պուէնոս Այրէս» գիրքին շնորհահանդէսը: ■
© 2023 Բոլոր իրաւունքները վերապահուած են։
