«Արցախի  ժողովուրդի  շահերու  եւ  իրաւունքներու  պաշտպանութեան  միութիւն»-ը  Յունիս  7-ին  քարոզարշաւ    սկսած է՝  կոչ  ընելով  COP29-ը  հիւրընկալող  Ազերպայճանին  կեանքի  կոչելու  «Խաղաղութեան  COP»-ի  իր  ենթադրեալ  տեսլականը՝  ազատ  արձակելով  հայ  քաղաքական բանտարկեալները:

Քարոզարշաւը  տեղի կ՚ունենայ  Պոննի՝  Կլիմայի  փոփոխութեան  համաժողովի  (Յունիս  3–13)  շրջածիրին մէջ։

Այս  համաժողովին  փորձագէտները  պիտի ճշդեն Նոյեմբերին Պաքուի մէջ կայանալիք  COP-ի  հանդիպումներուն  օրակարգը,  որուն  պիտի  մասնակցին  աշխարհի  առաջնորդները։

Այս  ուշագրաւ  քարոզարշաւին դրդապատճառ հանդիսացան՝  Ազերպայճանի  նախագահ  Իլհամ  Ալիևի  արտաքին  քաղաքականութեան  հարցերու  խորհրդական  Հիքմեթ  Հաճիեւի  անցեալ  ամիս  լրասփիւռներու  հետ  զրոյցին  ըսածները,  թէ  իր  երկիրը  կը փափաքի  «COP29»-ը  վերածել  «Խաղաղութեան  COP»-ի:

Հաճիեւի խօսքերը  լայնօրէն  քննադատուեցան։  Փորձագէտները  մատնանշեցին  հայերու  նկատմամբ  Ազերպայճանի  կառավարութեան  կատարած  ցեղասպանական  գործողութիւնները  եւ  այդ  երկրին մէջ  մարդկային իրաւանց  ոտնահարման  երկար  տարիներու  պատմութիւնը:

«Ազերպայճանի մէջ  Ալիեւի  վարչախումբը  կը  շարունակէ  շղթայուած պահել  հայ  քաղաքական բանտարկեալներն ու  պատանդները,  կ՚ոչնչացնէ  մեր  մշակութային  ժառանգութիւնն  ու  սեփականութիւնը,  որոնք բռնագրաւուած են,  համակարգուած  կերպով  հայութեան  դէմ  կը  քարոզէ  ցեղային ատելութիւն  եւ  կ՚արգիլէ  բռնի  կերպով  տեղահանուած  արցախցիներու տուն  վերադարձը։  Այս  գործողութիւնները՝  միջազգային  եւ  ներքին  այլ  ոճիրներու  հետ  մէկտեղ,  Արցախի  ժողովուրդի  նկատմամբ  Ազերպայճանի  շարունակուող  ցեղասպանական  քաղաքականութեան  ցայտուն  օրինակներն  են։  

Մեր  ջանքերը  նպատակ  ունին  իրազեկ պահելու  միջազգային  հանրութիւնը՝  Ալիեւի  վարչախումբին  կողմէ  շարունակուող  ոտնահարումներու  մասին,  ինչպէս  նաեւ    ընդգծելու  ապօրինի  կերպով  ձերբակալուած  մեր  ղեկավարներն  ու  հայրենակիցները  ազատ  արձակելու  հրատապ  անհրաժեշտութիւնը։  Միջազգային  հանրութիւնը  պէտք  չէ  թոյլ  տայ,  որ  Ալիեւի  վարչախումբը  մոլորեցնէ  ու  շեղէ  COP 29-ով եւ  խուսափի  պատասխանատւութենէն՝  իրագործած  ցեղասպանութեան  եւ  շարունակական  խախտումներուն  համար»,–  յայտնած  է  «Արցախի  ժողովուրդի  շահերու  եւ  իրաւունքներու  պաշտպանութեան  միութեան»  նախագահ,  Արցախի  նախկին  Պետական նախարար  Արտակ  Բեգլարեան։