Եւրոպական խորհրդարանի  նոր  բանաձեւերը.  «Անյապաղ  պատիժներ  կիրարկել  Ազերպայճանի  դէմ»  

Փետրուար  28-ին,  Եւրոպական խորհրդարանը  որդեգրած է    Եւրոպական Միութեան  (ԵՄ)  արտաքին,  անվտանգութեան եւ  պաշտպանութեան  քաղաքականութեան  վերաբերեալ  երկու  բանաձեւեր,  կոչ  յղելով  անյապաղ  պատիժներ  կիրարկելու  Ազերպայճանի  դէմ:  

Ազգային  ժողովի  «Քաղաքացիական  պայմանագիր»  խմբակցութեան  քարտուղար  Արթուր  Յովհաննիսեան  այս կապակցութեամբ Դիմագիրքի իր էջին գրառումով մասնաւորապէս նշած է.

«Եւրոպական խորհրդարանը իր որդեգրած երկու բանաձեւերով կոչ յղած է՝  անյապաղ  պատիժներ  կիրարկելու  Ազերպայճանի  դէմ  եւ  չեղեալ նկատելու  ուժանիւթի  գործընկերութեան  մասին  փոխըմբռնման  յուշագիրը,  պատրաստ  ըլլալու  թիրախաւորուած  եւ  անհատական  պատիժներ  սահմանելու  Ազերպայճանի  քաղաքական  ու  ռազմական  ղեկավարութեան  դէմ  եւ  Հայաստանի  դէմ  որեւէ  յարձակման  պարագային՝  կասեցնելու  Ազերպայճանէն  քարիւղի եւ կազի  ներածումը,  ամրապնդելու  Հայաստանի մէջ  ԵՄ-ի  առաքելութեան  լիազօրագիրը,  աւելցնելու  թիւը,  երկարաձգելու  անոր պայմանաժամը  եւ  դէտեր  տեղակայելու  Թուրքիոյ  հետ  սահմանին։ Եւ ի վերջոյ կասեցնելու  Ազերպայճանի  հետ  նոր  գործընկերութեան  համաձայնագրին  շուրջ  բանակցութիւնները»: