Պոլիս, «Նոր Մարմարա» – 10 Մայիս թուականը կը խորհրդանշէ իսթանպուլահայ հանրայայտ բանաստեղծ Զահրատի ծննդեան օրը եւ «Զահրատ 100 տարեկան» կարգախօսի ներքեւ կարգ մը միջոցառումներ տեղի ունեցան Հայաստանի ու քաղաքիս մէջ:
Իսթանպուլեան ձեռնարկը սարքուեցաւ Էսաեան Սանուց Միութեան նախաձեռնութեամբ՝ Էսաեան վարժարանի սրահին մէջ:
Միջոցառումը իրենց ներկայութեամբ պատուեցին Ամեն. Ս. Պատրիարք հայրը, Գերշ. Տ. Արամ արք. Աթէշեան ու Արհի. Տ. Լեւոն արք. Զէքիեան, Հոգշ. Տ. Յարութիւն վրդ. Տամատեան:
Ներկայ էին Զահրատի կողակիցը՝ տիկին Անայիս Եալտըզճեան, գիր-գրականութեան սիրահարներ ու մշակութասէր խուռներամ բազմութիւն մը:
Բացման խօսքը արտասանեց Սանուց Միութեան վարչութեան ատենապետուհի տիկին Մարիամ Տրամէրեան, ուշագրաւ մանրամասնութիւններ ներկայացնելով Զահրատի ստեղծագործական կեանքէն ու գործունէութենէն:
Գեղարուեստական յայտագրի ընթացքին հանդէս եկան օփերայի երգիչներ Արթիւր Պաղտասարեան, Գարին Չուպուքճեան-Պօզքուրթ, մեր սիրելի ասմունքողուհի Տիկին Սիլվա Կոմիկեան՝ բանաստեղծութիւններով, Սեւան Տէյիրմէնճեան, Բագրատ Էսթուգեան, Տիգրան Ալթուն, Յովհաննէս Շաշքալ եւ Տարօն Մարտիկեան հրապարակային ասուլիսի ձեւով յիշատակներ պատմեցին Զահրատէն:
Հուսկ բանքը արտասանեց Ամեն. Ս. Պատրիարք հայրը:
© 2023 Բոլոր իրաւունքները վերապահուած են։
