2024 Մայիս 28-ին Ընկերվար Երիտասարդներու Միջազգային Միութիւնը (Ը.Ե.Մ.Մ.) հրապարակած է հետեւեալ յայտարարութիւնը՝ դատապարտելով Հայաստանի մէջ «Տաւուշը յանուն Հայրենիքի» շարժումի նկատմամբ ոստիկանական բռնութիւնները.
«Ը.Ե.Մ.Մ.-ն կը յայտնէ իր մտահոգութիւնը Հայաստանի եւ Ազերպայճանի միջեւ ընթացող սահմանի զատման եւ սահմանագծման գործընթացին մասին, մասնաւորապէս Տաւուշի մարզին մէջ: Ազերպայճան այս գործընթացը յառաջ կը մղէ ուժի սպառնալիքի պայմաններու մէջ, որուն հետեւանքով կը խաթարուի Հայաստանի ինքիշխանութիւնը եւ օրինականութիւնը:
Հարկադրանքի տակ իրականացուող սահմանային փոփոխութիւնները կը հակասեն ոչ միայն Հայաստանի օրէնքին այլ նաեւ միջազգային օրինաչափութեան: Հայաստան ըլլալով շրջափակուած երկիր, պէտք չէ պարտադրուի տարածքներ զիջելու եւ խաթարելու իր սեփական ազգային անվտանգութիւնը: Այսպիսի բռնաճնշումներ կը խրախուսեն միայն Ազերպայճանը եւ կը նպաստեն Հայաստանի տկարացման, բազմապատկելով հնարաւորութիւնը հակամարտութեան վերանորոգման:
Հայաստանի հասարակութեան տարբեր խաւերը իրենց արդար բողոքը կը յայտնեն կատարուածին համար եւ անոնք ամբողջութեամբ կը վայելեն մեր աջակցութիւնը:
Խստօրէն կը դատապարտենք իշխանութեան իրաւապահ մարմիններու կողմէ ցուցարարներու նկատմամբ բիրտ եւ անհամաչափ ուժի կիրարկումը: Կոչ կ’ընենք Հայաստանի իշխանութիւններուն յարգելու իր քաղաքացիներուն ազատ խօսքի եւ անհամաձայնութիւն արտայայտելու մասին սահամանադրական իրաւունքը:
Կոչ կ’ընենք ՄԱԿ-ին, Եւրոպայի անվտանգութեան եւ համագործակցութեան կազմակերպութեան եւ հակամարտութեան հանգուցալուծման համար շահագրգիռ բոլոր կողմերուն դատապարտելու Ազերպայճանի գործողութիւնները եւ ձեռնարկելու համապատասխան միջոցներ, ներառեալ պատիժներու կիրարկում, պատասխանատւութեան ենթարկելու համար Ալիեւի բռնատիրական վարչակազմը՝ անոր վարած յարձակողապաշտ եւ ուժի սպառնալիքի անօրինական քաղաքականութեան համար:
Կայուն եւ տեւական խաղաղութիւն կարելի է իրագործել միայն այն միջավայրին մէջ ուրկէ կը բացակային հարկադրանքն ու բռնութիւնը: Ը.Ե.Մ.Մ.-ն ջատագովն է արդար եւ իրաւաբանօրէն հիմնաւորուած հանգուցալուծման, որ կը յարգէ Հայաստանի ինքիշխանութիւնը եւ միջազգային օրէնքը»:
© 2023 Բոլոր իրաւունքները վերապահուած են։
