Մայր Աթոռի տեղեկատուական գրասենեակը Սեպտեմբեր 27-ին հրապարակած է հետեւեալ հաղորդագրութիւնը.

«Այսօր՝ Սեպտեմբերի 27-ին, «X»  ընկերային ցանցին վրայ տարածուել է տեսանիւթ, որտեղ երկու ադրբեջանցի զինուոր կրակում են 13-րդ դարում կառուցուած Չարեքթարի վանքի վրայ։ Մայր Աթոռ Սուրբ Էջմիածինը խստօրէն դատապարտում է Ադրբեջանի որդեգրած քաղաքականութիւնը՝ ուղղուած ոչնչացնելու Արցախի հայկական կրօնական եւ մշակութային ժառանգութիւնը։ Այս եւ նմանատիպ այլ արարքներ ցոյց են տալիս, որ Ադրբեջանը ամէն կերպ շարունակելու է իր որդեգրած քաղաքականութիւնը՝ ոչնչացնելու ու վերացնելու Արցախում հայկական ինքնութիւնը։

Այս համածիրի մէջ առաւել անիրատեսական են դառնում Արցախում Հայերի եւ Ադրբեջանցիների խաղաղ համակեցութեան մասին խօսակցութիւնները։ Մենք մշակութային ժառանգութեան պահպանութեամբ զբաղուող բոլոր միջազգային կառոյցների ուշադրութիւնն ենք հրաւիրում կատարուածի վրայ եւ պահանջում, որ պատշաճ գնահատական տրուի կատարուածին՝ կանխելու համար հետագայ նմանատիպ մշակութակործան դէպքերը»։