Սեպտեմբեր 8-ին եւ 9-ին վարչապետ Փաշինեան հեռաձայնային զրոյց ունեցած է Ֆրանսայի եւ Իրանի նախագահներ՝ Էմանիւէլ Մաքրոնի եւ Իպրահիմ Ռայիսիի, Գերմանիոյ եւ Վրաստանի վարչապետեր՝ Օլաֆ Շոլցի եւ Իրաքլի Ղարիպաշվիլիի եւ ԱՄՆ-ու Արտաքին գործոց նախարար Էնթընի Պլինքընի հետ։

Քննարկուած են տարածաշրջանին մէջ ստեղծուած իրավիճակին վերաբերող հարցեր: Կողմերը մասնաւորապէս անդրադարձած են Բերձորի միջանցքի ապօրինի փակման հետևանքով Արցախի մէջ խորացող մարդասիրական ճգնաժամին, Արցախի շուրջ ազերպայճանական զօրքերու կուտակման, Հայաստան-Ազերպայճան պետական սահմանին լարումը սաստակացնելու միտումներուն:

Վարչապետը անգամ մը եւս ընդգծած է իր հաւատարմութիւնը 2022 Հոկտեմբեր 6-ին Փրակայի եւ 2023 Մայիս 14-ին Պրիւսէլի մէջ գոյացած համաձայնութիւններուն, ինչպէս նաեւ բոլոր հարցերը բացառապէս դիւանագիտական եղանակներով ու շինիչ մթնոլորտի մէջ լուծելու մօտեցումներուն:

Ան պատրաստակամութիւն յայտնած է լարումը մեղմելու ուղղուած հրատապ քննարկումներ ունենալու Ազերպայճանի նախագահին հետ:

Ռաիսի՝ Փաշինեանին. «Տարածաշրջանին մէջ որեւէ փոփոխութիւն Իրանի համար կարմիր գիծ կը համարուի»

Իրանի նախագահ Իպրահիմ Ռայիսի Հայաստանի վարչապետին հետ հեռաձայնային զրոյցին յայտնած է, թէ «տարածաշրջանին մէջ եւ անոր սահմաններու որեւէ փոփոխութիւն Իրանի համար կարմիր գիծ կը համարուի»։

Սոյն տեղեկութիւնը հաղորդած է Sputnikarmenia-ն՝ յղում ընելով Miranpress-ին։

Ռայիսի ընդգծած է, թէ «3+3» ձեւաչափէն դուրս շփումները, օտարներու հետ համագործակցութիւնը, անոնց հետ ռազմափորձերու մասնակցիլը եւ կասկածելի ճամբորդութիւնները միայն կը բարդացնեն իրավիճակը։

Ան միաժամանակ նշած է, թէ Իրան պատրաստ է օգնելու Հայաստանին եւ Ազերպայճանին՝ առկայ խնդիրները լուծելու հոլովոյթին մէջ։