Search
Close this search box.

ՎՐԱՍՏԱՆ. Սերգէյ Փարաջանովի անունը կրող փողոց՝ Թիֆլիսի մէջ

Թիֆլիսի Մթածմինդա թաղամասին մէջ Սերգէյ Փարաջանովի անունով վերակոչուած փողոցի ցուցատախտակին բացումը կատարուած է, Սաքրեպուլոյի (քաղաքային խորհուրդ) աննուններու եւ խորհրդանիշերու յանձնաժողովին նախաձեռնութեամբ: Լուրը հաղորդած է վրացական «Առաջին ալիք»-ը։

Սերգէյ Փարաջանովի անունով կոչուած է Քոթէ Մեսխիի նրբանցքը, ուր ապրած է բեմադիրը: Բացման արարողութեան ներկայ գտնուած են Քաղաքապետական խորհուրդի անդամներ, մշակոյթի, արուեստի բնագաւառի ներկայացուցիչներ, ինչպէս նաեւ Փարաջանովի ընկերներն ու հարազատները:

“Կարեւոր Է, որ իւրաքանչիւր թիֆլիսցի, մեր երիտասարդութիւնը, ապագայ սերունդը յիշէ հանճարեղ նկարիչը, որ մեծցած Է մեր մայրաքաղաքին մէջ”,– ըսած Է Թիֆլիսի Սաքրեպուլոյի ներկայացուցիչը՝ Մթածմինդայի շրջանէն երեսփոխան Զուրապ Ապաշիձէ: Ան ընդգծած Է, որ քաղաքային խորհուրդը եւ քաղաքապետարանը ամէն ինձ կ՚ընեն, որ յաւերժացուի Փարաջանովը, եւ փողոց մը բեմադիրին անունով կոչելը ատոր ակնառու օրինակն Է: Փարաջանովի «Աշուղ Ղարիբ», «Նռան գոյնը» եւ «Մոռցուած նախնիներու ստուերները» ֆիլմերը պաշտամունքի առարկայ դարձած են։ Ան հսկայական ազդեցութիւն գործած է ժամանակակից բազմաթիւ նկարիչներու, շարժանկարի բեմադիրներու եւ լուսանկարիչներու վրայ:

Խմբագրական