Շարժարուեստի աշխարհահռչակ Գաննի փառատօնի 2024-ի «Ոսկէ արմաւենի» մրցանակին արժանացած է հայ դերասաններ Կարէն Գարակիւլեանի եւ Վաչէ Թովմասեանի ալ մասնակցութեամբ նկարահանուած՝ բեմադիր Շըն Պեյքըրի «Անորա»-ն, որ այդ պատիւին արժանացած է 22 ֆիլմերու միջեւ։

«Մեծ մրցանակ»-ը շնորհուած է բեմադիր Փայալ Գաբատիայի «Մենք ամէն ինչ կը պատկերացնենք որպէս լոյս» ֆիլմին, որ Գաննի փառատօնին 30 տարիէ ի վեր ներկայացուած առաջին հնդկական ֆիլմն է։

Բեմադիր Ժաք Օտիառի նկարահանած «Էմիլիա Փերես» ֆիլմը արժանացած է դատակազմի մրցանակին։

Լաւագոյն դերասանուհիի մրցանակը շնորհուած է միաժամանակ 4 հոգիի՝ «Էմիլիա Փերես» մրցանակակիր ֆիլմին մէջի իր դերին համար Ատրիանա Փազին, ինչպէստ նաեւ Զոէ Սալտանիային, Գառլա Սոֆիա Կասքոնին եւ Սելենա Կոմեսին։

Լաւագոյն դերասան ճանաչցուած է Եորկոս Լանթիմոսի «Բարութեան տեսակները» ֆիլմին մէջ նկարահանուած Ճես Փլեմոնս։

Լաւագոյն բեմադիրի մրցանակը շնորհուած է Միկել Կոմեսին՝ «Grand Tour» ֆիլմին համար։

Լաւագոյն բեմագրութեան մրցանակին արժանի նկատուած է Գորալի Ֆարժայի՝ «The Substance» ֆիլմինը։

Յատուկ մրցանակը շնորհուած է բեմադիր Մոհամմատ Ռասուլոֆի «The Seed Of The Sacred Fig» ֆիլմին։

«Caméra d’Or» մրցանակը՝ բեմադիր Հալֆտան Ուլման Թոնտելի «Արման»-ին։

*  *  *

Կարէն Գարակիւլեան դերասան եւ բեմագիր է. կը գործէ ԱՄՆ-ու մէջ։ Ծանօթ է «Tangerine» (2015), «Starlet» (2012) եւ «Red Rocket» (2021) ֆիլմերով։

Վաչէ Թովմասեան, բուն անունով՝ Վաչագան Թովմասեան, հայաստանցի դերասան, կատակերգակ է եւ շօումէն։ Հայաստանի մէջ անոր «32 ատամ» հեռատեսիլի շօուն, այնուհետեւ «Վիտամին ակումբ»-ը մեծ տարածում գտած են։

Բացի հեռատեսիլի իր բազմաթիւ ելոյթներէն, 2012-ին ան խաղացած է «Lost & Found in Armenia» ժապաւէնին մէջ։