Նոյեմբեր 16-ին, Միւնիխի Ամենայն Սրբոց Արքունի եկեղեցւոյ լեփ-լեցուն դահլիճին մէջ տեղի ունեցած է «Armenian Colors Jazz Quartet» երաժշտական խումբին բարեսիրական համերգը, Վահագն Հայրապետեանի ղեկավարութեամբ: Համերգին խորագիրն էր “Aram Khachaturian meets JAZZ” եւ նուիրուած անոր ծննդեան 120-ամեակին։

Ողջոյնի խօսքով հանդէս եկած են Պաւարիոյ երկրամասին մէջ Հայաստանի պատուոյ հիւպատոս դոկտ. Քրիսթին Զասէ եւ ձեռնարկի կազմակերպիչ «EUROPAMUSICALE» Եւրոպական մշակութային հիմնադրամի խորհուրդի նախագահ Հելմութ Փաոլի: 

Հնչած են Արամ Խաչատրեանի յայտնի ստեղծագործութիւնները՝ ճազ մեկնաբանութեամբ, Մեծն Կոմիտասի եւ Տիգրան Մանսուրեանի յօրինումները եւ Վահագն Հայրապետեանի «Խաղաղութիւն» գործը: 

Նշենք, թէ տոմսերու վաճառքէն գոյացած հասոյթը Գերմանահայկական միութեան (DAV Social) միջոցով կը ղրկուի Հայաստան՝ Արցախէն բռնի տեղահանուած հայ ընտանիքներուն աջակցելու նպատակով: 

Համերգը արժանացած է հանդիսատեսի շատ ջերմ ընդունելութեան։ Ներկայ եղած են գերմանացի հասարակական եւ քաղաքական գործիչներ, հայ համայնքի ներկայացուցիչներ եւ ճազի սիրահարներ: ■