Եւրոպական յանձնաժողովի մամլոյ ծառայութիւնը հաղորդագրութեամբ մը կը տեղեկացնէ, թէ Եւրոպական Միութիւնը (ԵՄ) մարդասիրական օդային միջանցքով օգնութիւն պիտի հասցնէ պաշարուած Կազայի ժողովուրդին։
«ԵՄ-ը այժմ կը սկսի մարդասիրական օդային կամուրջի գործողութիւնը, որ բաղկացած է դէպի Եգիպտոս քանի մը թռիչքներէ՝ Կազայի հատուածին մէջ տեղակայուած մարդասիրական կազմակերպութիւններուն կենսական անհրաժեշտութեան պարագաներ մատակարարելու համար»,– նշուած է հաղորդագրութեան մէջ։
Այս կապակցութեամբ Ազգային ժողովի «Պատիւ ունեմ» խմբակցութեան քարտուղար Տիգրան Աբրահամեան Դիմագիրքի իր էջին կատարած է հետեւեալ գրառումը.
«Եւրոպական յանձնաժողովը յայտարարած է “ԵՄ-ի մարդասիրական օդային կամուրջ” գործողութիւնը սկսելու մասին՝ Կազա մարդասիրական օգնութիւն հասցնելու նպատակով։
Ես, ի հարկէ, դէմ չեմ Կազայի խաղաղ բնակիչներուն մարդասիրական իրաւունքներու պաշտպանութեան, եւ ինչ որ տեղի կ՚ունենայ վերջին օրերուն, պարզապէս մարդկային ողբերգութիւն է` երկուստեք հազարաւոր զոհեր, որոնց մէջ կիներ եւ երախաներ:
Բայց ինչո՞ւ միջազգային դերակատարները մարդասիրական օդային միջանցք չբացին Արցախի 9-ամսեայ շրջափակման ընթացքին, ինչո՞ւ նոյն դերակատարները լուռ կը հետեւէին ազերպայճանական անմարդկային գործողութիւններուն եւ Արցախի մէջ ցեղային զտման արարքներուն: Անոնք իրենց անտարբերութեամբ ու լռութեամբ պատճառ դարձան հարիւրաւոր զոհերու եւ նպաստեցին Արցախահայութեան հայրենազրկման գործընթացին»:
© 2023 Բոլոր իրաւունքները վերապահուած են։
