Ապրիլ 10-ին, Ազգային ժողովին մէջ կառավարութեան ծրագրին 2023-ի արդիւնքներու մասին զեկոյցի քննարկումին, վարչապետ Փաշինեան յայտարարած է. “Պատմական Հայաստանը չի ճանաչում իրական Հայաստանի տարածքային ամբողջականութիւնը, պատմական Հայաստանն ու իրական Հայաստանը ոչ միայն համատեղելի չեն, այլեւ յաճախ հակոտնեայ են միմեանց եւ նոյնիսկ լրջագոյն սպառնալիքներ են ստեղծում մէկը միւսի համար։
Մենք պէտք է կենտրոնանանք իրական Հայաստանի շահերի սպասարկման վրայ, հակառակ պարագայում մենք անվտանգային արտաքին մարտահրաւէրները հասցէագրելու հնարաւորութիւն չենք ունենայ նոյնիսկ, որովհետեւ կ՚ունենանք արտաքին սպառնալիքներ յառաջացնող յարատեւ աղբիւր մեր իսկ ներսում մեր ամէնօրեայ իրականութեան մէջ։ Իրական Հայաստանը միջազգայնօրէն ճանաչուած 29 հազար 743 քառակուսի կիլոմետր տարածք ունեցող երկիրն է”
Նոյն նիստին, վարչապետը արծարծած է նաեւ այլ նիւթեր, որոնց համառօտ պատկերը հետեւեալն է.
– «Դէմ չենք Ադրբեջանի հետ սահմանազատման գործընթացը սկսել Հայաստանի Տաւուշի մարզի եւ Ադրբեջանի Ղազախի շրջանի 4 գիւղերի հատուածներից։ Բայց դա չի երաշխաւորում որ Հայաստանի վրայ նոր յարձակում չի լինի»։
– «Հայաստան-Ռուսաստան միջպետական յարաբերութիւններն ակնյայտօրէն իրենց լաւագոյն ժամանակները չեն ապրում, բայց որոնց կարեւորութիւնը մեր պետականութեան, ինքնիշխանութեան, անվտանգութեան եւ տնտեսութեան համար դժուար է թերագնահատել։
Հայաստանը չի ցանկանում Ռուսաստանի հետ վիճել ոչ միայն այն պատճառով որ դրա հնարաւորութիւնն ու ուժը չունի, այլ որովհետեւ մենք գնահատում ենք այն հսկայական դրականը, որ եղել է ու կայ մեր յարաբերութիւնների մէջ»։
– «Իրանի հետ յարաբերութիւնները չենք հակադրելու Արեւմուտքի հետ կապերին»։
– «Ցաւօք, Լեռնային Ղարաբաղի նախկին վերնախաւի որոշ ներկայացուցիչներ կարծես չեն ուզում հրաժարուել Հայաստանում թշնամական հարուածների փարոսիկի դերից։ Բայց այս թեմայով նոր ասելիք չունեմ, ասել եմ ու կրկին ասում եմ՝ Հայաստանում չի կարող լինել երկրորդ կառավարութիւն, Հայաստանում կայ մէ՛կ կառավարութիւն եւ այդ կառավարութիւնը նստած է այս դահլիճում, Հայաստանում կայ մէ՛կ Ազգային ժողով եւ այդ Ազգային ժողովը նստած է այս դահլիճում»։
– «Հայաստանում Եւրոպական Միութեան դիտորդական առաքելութեան ժամկէտը կարող է եւս երկու տարիով երկարաձգուել»։
© 2023 Բոլոր իրաւունքները վերապահուած են։
